LAOAG CITY – Nadismaya dagiti sumagmamano a Pilipino iti pannakitaripnong da ken ni Presidente Rodrigo Duterte idiay Russia.
Daytoy ti inbatad ni Miss Ystiel Mina, taga Tagudin, Ilocos Sur ngem agdama nga agtrab-trabaho idiay Russia.
Iti eksklusibo nga interview ti Bombo Radyo Laoag, inbatad na a saan a ti kangrunaan a pakaseknan da ti napagsasaritaan no di ket maipanggep ti human rights, drugs ken dadduma pay.
Immun-una iti daytoy, inbatad ni Mina a maymaysa ti napagtutulagan da kadagiti pada na a Pilipino a napili a nakipagkita ken ni Presidente Duterte, daytoy ket ti panangipasa koma ti Pilipinas ken Russia iti bilateral labor agreement tapno agbalin da a legal kas “household worker” iti nasao a pagilyan.
Nupay kasta, kuna ni Mina a ti laeng nadakamat ni Duterte ket maipapan kadagiti “expired” ti pasaporte na a pilipino idiay Russia.
Innayon ni Mina a kaaduan kadagiti nadakamat ni Presidente Duterte ket maipanggep kadagiti mapaspasamak ditoy pagilyan kas ti human rights, drug operations, ken dadduma pay.
