LAOAG CITY – Kwinestionaran dagiti estudiante ti University of Manila (PLM) ti desision ti Board of Regents a mangipaay iti honorary Doctor of Laws degree ken ni Presidente Ferdinand Marcos Jr.
Iti nagtipon a palawag ti PLM Supreme Student Council ken 33 a dadduma pay nga student council ken organisasion, kinunada a saanda a nakonsulta iti nasao a pannakabigbig ken mabalin a makita daytoy a kas panangi-endorso ti administrasion ni Marcos, nga agtultuloy a sangsanguenna dagiti isyu iti transparency, accountability, ken human rights.
Impanagetget dagiti estudiante a nangatngato koma ti pagrukodan iti pannakaipaay ti honorary degrees ngem saad ti maysa a personalidad.
Napadayawan ni Marcos Jr. iti honorary Doctor of Laws degree babaen ti PLM idi Agosto 27 kas panangbigbig, segun iti unibersidad, iti suportana kadagiti proyekto ti pagadalan, pakairamanan ti pannakaibangon ti PLM Medicine and Allied Sciences Building.
Kabayatanna, nagkiddaw met ti PLM College of Law Student Council iti pannakalawlawag no nasurot dagiti pagalagadan ti Legal Education Board iti panangipaay iti honorary degree.
Pinagduaduaan da no natungpal ni Marcos ti requirement nga addaan iti baccalaureate degree wenno ti katupagna manipud iti mabigbigbig nga institusion.
Segun iti University of Oxford, saan a naturpos ni Marcos ti Bachelor of Arts degree-na iti Philosophy, Politics and Economics ngem nudiket naipaayan ti Special Diploma in Social Studies idi 1978.
Kabayatanna, impetteng ni PLM Board of Regents Chair Edward Serapio nga naipaay ti honorary degree ken ni Marcos kas panangbigbig iti suporta ti Presidente iti edukasion ken pannakaibangon ti baro a pasdek ti unibersidad.
