LAOAG CITY – Inpakaammo ni Police Lieutenant Colonel Adrian Gayuchan, ti Hepe iti Philippine National Police iti siudad ti Batac a saan a mabalin nga itulek nga agsada dagiti kameng ti kapulisan kadagiti sumagmamano a motorista para laeng iti dokumentasion dagitoy.
Daytoy ket kalpasan nga adda ti naawat nga impormasion ti Bombo Radyo Laoag nga adda dagiti sumagmamano a police personnel iti siudad ti Batac ken ditoy siudad ti Laoag a maipagarup a sadaenda dagiti motorista nga agdalyasat tapno paruarenda nga adda ti maisaysayangkat a checkpoint banag a naiget a kinondenar dagiti maseknan a motorista daytoy nga aramid dagiti otoridad gapu ta mataktakda iti biahe.
Segun ken ni Police Lieutenant Colonel Gayuchan, naiget a maipawil iti Philippine National Police ti nasao a reklamo kontra kadagiti sumagmamano a pulis gapu ta masapol ti seryoso a pannakaipatungpal ti Oplan Sita ken Checkpoint.
Inbatadna a kasapulan ti naiget a panangipatungpal kadagiti traffic laws ken ordinance nangruna kadagiti aglabsing kadagitoy a dagusda nga ikkan ti citation ticket.
Inlawlawagna nga amin a citation ticket ket iripripresentarna tunggal tallo a bulan a mangipaneknek nga adda dagiti natiliwanda kabayat ti panangisayangkatda kadagiti programada iti nailian a pulisia.
Mainaig iti daytoy, kunana nga amin a klase ti lugan ket sadaenda no mangisaysayangkatda ti checkpoint idinto a no Oplan Sita ket no adda dagiti naitawag kadakuada manipod iti sabali a Police Station nga adda ti naglibas a suspek iti lugarda.
Inpalgakna a no mapaneknekan nga adda ti police personnel nga agar-aramid a maikanniwas iti paglintegan ket sumango iti administrative case.
Innayonna nga awan ti maaw-awatda nga aniaman nga insentibo iti naiget a panangipatungpalda kadagiti operasionda.
Kabayatanna, inpakaammo ni Police Lieutenant Colonel Andrew Rabang, ti Hepe iti Philippine National Police ditoy siudad ti Laoag a maibilang daytoy kas paset ti procedure dagiti kapulisan no sadino ti panangipatungpal ti checkpoint ket masada amin a dumalyasat a motorista tapno maipasigurado a sumursurotda iti linteg-trapiko idinto a ti Oplan Sita ket agsada dagitoy ti dua agingga tallo nga indibidual.
