LAOAG CITY – Inpakaammo ni Mr. Noli Garcia, ti Terminal Supervisor iti Partas Terminal ditoy siudad ti Laoag a dupudupen dagiti pasahero nga agsubli idiay Metro Manila ita a Domingo Hallelujah wenno kagiddan ti panagngudo ti Semana Santa.
Segun kenkuana, sipod pay idi kalman ket nangrugi nga agsangpeten ken agsasaruno dagiti pasahero nga agturong iti terminal-da tapno saanda a maibusan ti pagtugawagan dagitoy.
Inbatadna a ti kinapudnona ket naka-fully booked-dan kadagitoy a gundaway gapu ta adu dagiti immun-unan a nagpaserba kadagiti tiketda nangruna kadagiti adayo pay ti paggapoanda.
Inlawlawagna a kaadduan kadagiti pasahero ket agturong wenno agsubli idiay Metro Manila ken Baguio City no sadino ket agtultuloy pay laeng a manaynayonan dagiti pasahero.
Innayonna a mangnamnama daytoy nga addanto pay ti bakante a lugan wenno pagtugawan dagiti pasahero tapno maakomodar amin dagitoy.
Maipalagip a kellaat nga immadu ti bilang dagiti pasahero ditoy probinisia kagiddan ti pannakaobserbar ti Semana Santa.
