LAOAG CITY – Awan ti naisayangkat nga aniaman nga aktibidad wenno programa iti Kapitolio Probinsial ti Ilocos Norte para iti maikatlo nga State of the Nation Address wenno SONA ni Presidente Ferdinand Bongbong Marcos Jr.
Nupay kasta, basar iti nagbalin nga obserbasion ti Bombo Radyo Laoag News Team ket adda dagiti nai-deploy a sumagmamano a kameng ti pulis iti sango ken iti aglawlaw iti Kapitolio Probinsial.
Iti pannakisarsarita ti News Team ken ni Police Master Sergeant Richard Lucero, adda ti walo a pulis ti nadutukan a nai-deploy nga agbantay iti Kapitolio Probinsial tapno maipasigurado nga awan ti mapasamak a riribuk kabayatan ti State of the Nation Address ni Pres. Marcos.
Inbatadna a no bilang adda ti mangiwayat ti tignay protesta ket saanda a patalawen ngem bantayanda a niambag dagitoy amangan laeng ket mangitunda ti problema wenno parikot iti taray ti trapiko.
Kunana nga adda pay dagiti pulis nga agliklikos nga agpatpatrolya tapno maipasigurado ti linak, urnos ken talna ditoy probinsia.
Kabayatanna, naammoan nga awan ti naiyuswat a public viewing para iti State of the Nation Address ni Pres. Marcos.
