LAOAG CITY – Inlawlawag ni Dr. Liza Marie Paz-Tan, maysa a dermatologist nu ania dagiti kangrunaan a rason iti pannakapasar ti skin asthma.
Kuna ni Paz-Tan a ti nasao a kondisyon ket kangrunaan nga epekto ti nabara a paniempo.
Inbatad na a malaksid iti daytoy ket mabalin pay nga ad-dda a rumuar ti skin asthma kadagiti mannangan ti preservative foods, addaan ti chemical exposure ken dadduma pay.
Mainaig iti daytoy, inpakaammo ni Paz-Tan nga agbalin a delikado ti skin asthma nu mangitunda iti panagsugat ti kudil gapu iti panagkudkod.
Inlawlawag na a daytoy ket gapu ta sumrek ti secondary bacterial ken fungal infection iti masugatan a kudil.
Inbunannag na a nu saan a dagus maagasan daytoy ket mabalin a mangitunda iti sabali a sakit kas iti cellulites ken sepsis.
Kabayatanna, inpakaammo ni Paz-Tan a maysa kadagiti umuna nga agas tapno agsardeng ti panagbudo ti skin asthma ket ti panangdepdep iti nalamiis a danom wenno ice.
Innayun na a mabalin pay dagiti over the counter nga agas tapno maep-epan ti panagbudo daytoy nu nabaybayag ngem tallo nga aldaw ket masapol nga ipakonsultar iti doktor.
