LAOAG CITY – Nadismaya ti sumagmamano a religious sector kalpasan nga uppat laeng a kandidato ti nagatendar iti Peace Covenant Signing wenno Timpuyog Program a nagbinnuligan nga inorganisar ti Ilocos Norte Police Provincial Office ken Commission on Elections ditoy ciudad ti Laoag.
Karaman kadagiti nagatendar ket ni Mayor Michael Marcos-Keon, Vice Mayor Rey Carlos Fariñas, Atty. Marlon Manuel ken ni Sang Panlungsod member John Michael Fariñas.
Gagem ti Peace Covenant Signing a mapagtalinaed ti linak, urnus ken talna bayat iti panangrugin ti kampanya para iti local positions.
Ti Peace Covenant Signing ket nangrugi koma iti alas-tres itay malem ngem narugyan iti oras ti alas-4:20 gapu ta inur-uray ti Ilocos Norte Police Provincial Office ken Commission on Elections dagiti dadduma pay a kandidato ditoy ciudad ti Laoag.
Nupay kasta, awan ti nauray dagiti maseknan rason nga inwayat da lattan ti Peace Covenant Signing.
Kabayatanna, inpetteng ni Atty. Julius Balbas, ti Commission on Election Officer ditoy ciudad a napinpintas koma no ad-ado dagiti kandidato a napan nagatendar iti peace covenant signing tapno naidanun da dagiti concern da para iti mapaspasangasangan nga eleksyon.
Inlawlawag ni Balbas nga iti maikadwa a lawas ti Marso ita a tawen ket adda ti immuna a naipatungpal a covenant signing ngem ado dagiti saan a nagatendar.
Iti baet daytoy, kuna ni Balbas nga intono Abril ita a tawen ket imbitaran danto manen dagiti amin a kandidato para iti maipatungpal nga Unity Walk ditoy ciudad ti Laoag.
Mangnamnama ni Balbas nga ado wenno makaatendar to aminen dagiti kandidato ditoy ciudad.
