LAOAG CITY – Inpakaammo ni Barangay Chairman Jessie Chris Lagundino, ti Brgy. Pancian iti ili ti Pagudpud a nagawiden dagiti residente a nagbakwit kadagiti evacuation center gapu iti Bagyo Ofel.
Segun kenkuana, naipaayen ti naan-anay a tulong dagiti maseknan a residente kabayatan ti kaaddada iti evacuation center.
Inbatadna a dagiti met kabarangayanna a naminpinsan a nadadael ti pagtaenganda gapu kadagiti naglabas a bagyo ket naikkan ti construction materials manipud iti gobierno probinsial.
Inlawlawagna a napintas ken naannayas ti panagdalyasat dagiti motorista iti paset ti Sitio Banquero iti Brgy. Pancial iti ili ti Pagudpud.
Kabayatanna, kiniddaw ni Kapitan Lagundino ti pannakaisubli ti internet access connection-da iti kabiitan a panawen nangruna ket masapolda ti koneksion para iti panangi-report-da kadagiti agdama a mapaspasamak iti lugarda.
