LAOAG CITY – Nakaawiden dagiti sumagmamano a residente iti Brgy. 32-C, Lapaz ditoy siudad ti Laoag kadagiti pagtaenganda.
Daytoy ket kalpasan a nagibakwit dagitoy gapu iti nakaro a layus gubuay iti napigsa a tudo ti Bagyo Carina.
Segun ken ni Ms. Leilanie Asuncion, maysa kadagiti Barangay Health Worker ti nasao a barangay a dumanon iti 12 a pamilia wenno bukbuklen ti 51 nga indibidual ti inbakwitda kalpasan a nakapasar ti pagat-siket a layus.
Inbatadna a siam kadagiti pamilia a naibakwit ket mas pinilida a temporario a makipagnaed kadagiti kabagianda nga adda iti nangato a lugar idinto a dagiti tallo a pamilia ket nagtalinaed iti barangay hall.
Kunana nga iti oras ti alas dos idi kalman ket napalubusan dagitoyen a nagsubli kadagiti pagtaenganda gapu ta nages-esen ti danum.
Mainaig iti daytoy, inpakaammo ni Brgy. Kagawad Dominic Liberato nga agtultuloy ti panagmonitorda nangruna iti lebel ti karayan a kangrunaan a rason iti panalayus iti barangayda.
Kabayatanna, inbatad ni Mr. Antonio Duldulao, maysa kadagiti residente iti nasao a barangay a saan a nakaturturog gapu iti panagbantayna iti panagngato ti lebel ti danum iti sango ti pagtaenganda.
Kunana nga iti oras ti alas dies idi kalman ket inyakardan dagiti tarakenda iti nangatngato a lugar gapu ta dumanonen iti siket ti danum.
Nupay kasta, inpettengna a saan a nagibakwit gapu ta saanna a matalawan dagiti tarakenna.
