LAOAG CITY – Nagpanawagan ita iti gobierno kangrunaanna iti Local Government Unit dagiti residente ti Sitio Guintubdan La Carlota, Negros Occidental ti kanayunan a medical equipment iti lugar.
Basar kadagiti residente, sumagmamano kadakuada ket nagsakit ken makapaspasar ti respiratory diseases sipod idi bimtak ti bulkan iti napalabas a lawas.
Karaman kadagiti reklamo dagitoy ket ti pannakapasar ti panateng, nabangsit nga angot ti abo ken sulfur a naggapu iti bulkan idinto dagiti dadduma ket makapaspasar ti diarrhea gapu metten iti kinaawan ti nadalus a mainum a danum iti lugarda.
Kangrunaan nga ikidkiddawda iti lokal a gobierno ti pannakainayon ti oxygen tanks, dagiti kama iti ospital ken pakairamanan dagit dadduma pay a supplies.
Inbatad ni City Social Welfare and Development Office Head Angie Gelongo a ti City Disaster Risk Reduction and Management Council ket nakaestablisaren ti improvised clinic iti lugar kas sungbat iti pagkasapulan ti lugar.
Maipalagip a nangrugi a bimtak ti bulkan Kanlaon iti napalabas a lawas ken nagpugso daytoy ti sumurok 500 a metro ti abo rason nga inpangato dagiti otoridad ti alert level 2.
Daytoy ket maiyat-atnag no adda ti panagngato ti bilang dagiti mairekrekord a ginggined gubuay iti bulkan ken dadduma pay aktibidad.
Nangipatungpal met ti 60-day price freeze ti Department of Trade and Industry iti ili ti La Castellana nga adda iti state of calamity idi makapasarda ti lahar gapu iti napipigsa a tudo.
