LAOAG CITY – Nagsublin iti normal ti sitwasyon idiay Seoul, South Korea kalpasan ti napasamak a nalawa a layos gapu iti sumagmamano nga aldaw a pinagtudo na ti napigsa.
Inreport ni Bombo International News Correspondent Zenny Cloza iti Yongsan, Seoul, South Korea a malaksid kadagiti siyam a kumpirmado a pimmusay ket adda pay dagiti sumagmamano a residente a nagtalinaed a mapukpukaw.
Inbaga na nga iti baet nga ado pay dagiti nasken a matarimaan ken maurnus kalpasan ti nalawa a layos iti kabisera ti South Korea ket nagsublin iti normal ti sitwasyon iti lugar.
Innayon na nga alisto ti panagtignay ti gobierno idiay South Korea tapno al-alisto a bumangon ken makarekobre ti pagilyan kalpasan ti napasaran da a didigra.
Mainaig iti daytoy, immapela ni Cloza kadagiti amin a Pilipino para iti panangikararag kadagiti kadaraan idiay South Korea tapno saan dan a mapasaran ti nakaro a layos.
