LAOAG CITY – Nangpartuat dagiti sumagmamano a residente iti Barangay Abkir iti ili ti Vintar ti tsinelas ken sapatos.
Segun ken ni Mayor Richard Degala, nakibinnuligda iti Department of Trade and Industry tapno mangisayangkat ti panagsanay maipanggep iti panagaramid ti tsinelas ken sapatos.
Inbatadna a dimmalan iti panagsanay dagiti maseknan a residente iti uneg ti maysa a bulan no sadinno a ditoy nga ad-adda a naasa ti abilidda iti panagaramid iti nasao a produkto.
Inlawlawagna a dakkel daytoy a tulong kadagiti residente gapu ta agbalin daytoy a nayon a pamastrekda a pangsupusop kadagiti inaldaw-aldaw a kasapulanda iti panagbiag.
Kunana a ti maited a sueldo kadagiti agbalin a mangmangged iti pannakailako kadagiti tsinelas ken sapatos ket aggapu mismo iti factory.
Innayonna nga iti agdama ket manarimaan ti panangasikasoda iti branding dagiti nasao a produkto tapno naan-anayton a mailako iti publiko.
