LAOAG CITY – Nagpetisyon dagiti sumagmamano a residente iti Barangay Buttong ditoy ciudad ti Laoag para iti panagkiddaw da a maiyababa ti oras ti operasyon ti maysa a club.
Iti nasao a petisyon, kalikagom da nga agpatingga laeng iti 12 ti tengnga ti rabii ti Biyernes ken Sabado operasyon ti pasdek manipud iti alas-diyes iti rabii agingga iti alas-kwatro iti parbangon.
Segun kadagiti agrekreklamo a residente, saan da a makainana gapo it kinaringgor ken adda pay dagiti mapaspasamak a riribok wenno panagga-apa dagiti customers.
Mainaig iti daytoy, nairiing met daytoy iti sesyon ti konseho ditoy ciudad ti Laoag no sadinno inbatad ni Vice Mayor Rey Carlos Fariñas nga adda ti maaramid nga addang iti daytoy a petisyon.
Inbatad met ni Konsehal Jason Perera a malaksid ti pannakairefer na daytoy iti Committee on Peace and Order nga idadaulwan ni konsehal Donald Nicolas, rumbeng nga adda ti insigida nga aksyon nangruna ket ado dagiti gulo a mapaspasamak.
Nadakamat pay ni Perera nga isuna pay ti abogado ti maysa kadagiti karaman iti napasamak a panagbinnagkong.
Kunana pay nga iti napalabas a Sanggunian ket naibaga nan daytoy kenni dati a Konsehal Handy Lao ken Konsehal Bjourn Lao no sadinno adda metten dagiti addang nga ar-aramiden da ngem adda latta dagiti madi a mapaspasamak.
Kalikagom pay ni Perera a maikkan ti kopya ti petisyon ti Chief of Police ditoy ciudad ti Laoag gapo ta ti ummuna a nasken a maaramid ket ti pannakadeploy dagiti kameng ti pulisya iti nasao a pasdek.
Kabayatanna, kinumpirmaran met ni Barangay Chairman Roniel Domingo iti Barangay Cabungaan-B a nakaawat met isuna ti kopya ti petisyon ni Mr. Benjamin Lopez ken kunana nga umanamong iti kiddaw dagiti sumagmamano a residente.
Immanamong pay daytoy iti reklamo dagiti resiente gapo ta pudno a natagari ken adda dagiti agkakabil nangruna no nabarteken dagitoy. Innayon na nga iti kada Biyernes ken Sabado ket adda ti maideploy a barangay tanod.
