LAOAG CITY – Agrekreklamo dagiti residente iti iti Barangay Liliputen iti ili ti Pinili gapo iti kaado ti ngilaw manipud iti poultry ni Nueva Era Mayor Aldrin Garvida.
Ti lokasyon ti poultry farm ket iti Barangay Bugayong iti ili ti Nueva Era ngem maapektaran ti barangay da gapo ta asieg da iti daytoy.
Segun kenni Barangay Chairman Elmher Yarcia, gapo iti kaado ti ngilaw ket arig na agmuskitero dagiti residente a mangan.
Inlawlawag na nga idi barangay kagawad pay laeng daytoy iti barangay da ket addan ti sumagmamano a ngilaw ngem nakarkaro ti kaado na iti daytoy a gundaway.
Inbatad na a daytoy ita ti kalikagom da a masolusyonan gapo ta saanen a makapangan a nasayaat dagiti bumarangay.
Mainaig iti daytoy, kunana nga indanon da met iti Sanitary Office ken napan da binisita ti lugar, ken adda met dagiti addang nga inaramid da.
Kabayatanna, inbatad ni Nueva Era Mayor Aldrin Garvida nga iti inspeksyon nga inyuswat ti inspector ti poultry ket adda ti nakita nga abot nga isu ti pagruwaran dagiti nagilaw ken daytoy ti serraan da. Inpanamnama pay ti Mayor a masolusyonan ti problema dagiti residente.
