LAOAG CITY – Ingalot dagiti sumagmamano a residente iti Barangay Poblacion dos iti ili ti Currimao ti bubungon ti balay da iti iduduprak ti bagyo Ambo.
Daytoy ti inpakaammo ni Barangay Chairwoman Adoracion Hernandez iti nasao a barangay.
Segun ken ni Hernandez, dagiti nagigalot ti bubungan ti balay da ket dagiti naaramid ti pagtaengan na kadagiti light materials.
Innaon na nga adda pay dagiti nagikabil ti dadakkel a bato ken daan a ligay iti galba na tapno masigurado a saan a basta malekkab ken maitayab no bilang kimmaro koma ti sitwasyon.
Mainaig iti dayto, inpakaammo ti kapitan nga uray awanen ti bagyo ditoy probinsya ket awan pay laeng dagiti kabarangayan da a mangngalap a mapalubusan a mapan agkalap iti baybay.
Kabayatanna, inpasigurado ni Police Capt. Michael Permison, ti chief of police iti ili ti Currimao a nakasagana latta dagiti equipment a mausar no kaspagarigan agtultuloy ti panagtudo na ti napigsa ken adda ti kasapulan a marespondean.
