LAOAG CITY – Kalikagum ti Presidente ti Provincial Quarry Operation a masolbar ti problema seknan iti desiltation project iti Gasgas Bridge iti ili ti Solsona.
Segun ken ni Mr. Jay Mac Rey Teodoro, Presidente ti Provincial Quarry Operation Office, nakikoordinar isuna iti lokal a gobierno iti ili ti Solsona tapno mamonitor dagiti agiwaywayat ti quarry operation iti nasao a karayan.
Inbatadna a namunganay daytoy kalpasan a maipagarup nga inbuntonda dagiti batbato iti karayan banag a saan a nainkalintegan.
Inlawlawagna nga adu a residente ti madanagan nangruna kadagiti agnanaed iti Brgy. Mariquet ken Puttao ken dadduma pay gapu ta awanen ti pagnaan ti danom no adda ti sumangbay a tudo wenno bagyo.
Innayonna a naiget ti pannakikoordinarda kadagiti maseknan a pangopisinaan tapno masolbar daytoy a parikot iti kabiitan a panawen.
