LAOAG CITY – Napukawan dagiti sumagmamano a residente kadagiti nagduduma nga ili ken siudad ditoy Ilocos Norte ti serbisio ti kuriente gapu iti iduduprak ti Bagyo Julian.
Segun ken ni Mr. Perry Martinez, Acting General Manager ti Ilocos Norte Electric Cooperative (INEC), adda dagiti sumagmamano a barangay manipud kadagiti pito a lugar ditoy probinsia a naapektaran ti panagpukaw ti serbisio ti kuriente kas iti ili ti Bacarra, Paoay, Marcos, Burgos, Bangui, Dingras ken iti siudad ti Batac.
Gapu iti daytoy, 24/7 a nakaalerto dagiti amin a kameng ti Ilocos Norte Electric Cooperative tapno matarimaan dagiti linya ti kuriente ken maisubli iti kabiitan a panawen.
Inlawlawagna a no ti Ilocos Norte ket naibayog iti pagsenyalan numero dos ket adda ti maipatungpal nga “Operation Bagyo” no sadinno ket otomatiko a mai-deploy ti frontline teams ti kooperatiba kadagiti lugar nga ad-adda a naapektaran ti bagyo.
Kunana nga adda ti sursurutenda a criteria apaman ti panangpatayda ti serbisio ti kuriente no daytoy ket maapektaran ti linya ti kuriente ken para iti kinatalged dagiti umili.
Mainaig iti daytoy, inpakaammo ni Mr. Martinez nga adda ti 16 a frontline teams a bukbuklen ti tallo agingga uppat a linemen ti mapan kadagiti maseknan a lugar tapno isubli ti serbision ti kuriente.
Kabayatanna, kiniddaw ti Acting General Manager a dagus nga i-report kadakuada no napukawanda ti serbisio ti kuriente tapno ammoda met laeng dagiti maiyannatop nga addang nga aramidenda.
