LAOAG CITY – Inpakaammo ni Brgy. Chairman Eleazar Flojo ti Brgy. 7, San Manuel iti ili ti Sarrat nga adda dagiti sumagmamano a residente a kabarangayanda a nairamraman a nailista iti contact tracing iti laksid a saanda a close contacts wenno nakapulapol ti nagpositibo ti COVID-19.
Segun kenkuana, tallo laeng a nagan ti inpasana nga immuna iti Rural Health Unit (RHU) iti ili ti Sarrat ngem masdaaw idi nakaawat ti text message manipod iti RHU a nanayonan ti bilang dagiti karaman iti contact tracing.
Inbatadna a manipod iti tallo a bilang nga immuna nga nailista ket nagbalin a 11 kalpasan a nairaman pay dagiti walo nga indibidual.
Gapu iti daytoy, inbaga na a dagus a nakikoordinar iti RHU tapno maberipikar a naimbag nangruna ket makagura dagiti dadduma a nairamraman iti contact tracing.
Inlawlawag na a basar ken ni Dr. Jeniffer Valdez ti Municipal Health Officer, nairaman dagiti walo nga indibidual iti naisayangkat a contact tracing gapu ta isu ti naukkon nga impormasyon dagiti contact tracers manipod iti residente a nagpositibo ti COVID-19.
Mainaig iti daytoy, kadagupan kadagiti walo a nainayon ket maysa ditoy ket taga ili ti San Nicolas rason nga inyendorsarda daytoy iti RHU-San Nicolas ken dagiti uppat nga agkakapamilia ket isu ti dimmalan ti RT-PCR test no sadino ket maysa kadakuada ti nagpositibo ti COVID-19 idinto a dagiti dadduma ket saandan a napilit a nag-swab test.
Kabayatanna, naammoan a dagiti nagpositibo iti COVID-19 a karaman iti contact tracing ket mannarimaan a naka-quarantine iti Municipal Isolation Unit iti nasao nga ili.
