LAOAG CITY – Positibo ti naiyuswat a search operation iti Sitio 4 iti Brgy. 45-Tangid ditoy siudad ti Laoag.
Nabigbig ti subject ti operasyon a ni Walter Juan y De Fiesta wenno alyas WLAC, agtawen ti 44, Call Center Agent ti maysa a Business Process Outsourcing (BPO) Company ken residente ti nasao a Barangay.
Iti napagsukimat dagiti otoridad iti pagtaengan ti suspek, nakita iti uneg ti kwarto na ti karton ti sigarilyo a naglaon ti uppat a pedaso ti transparent plastic sachet ti maatap a shabu, maysa nga heat sealed transparent plastic sachet ti maipagarup a napagango a marijuana, 11 a pedaso ti open plastic sachet nga awan ti linaon na.
Mainaig iti daytoy, karaman kadagiti nakumpiskar ket maysa a karton ti selpon a naglaon ti pito a pedaso ti transparent plastic sachet ti maatap a shabu ken nagduduma a drug paraphernalia.
Malaksid kadagiti maatap nga iligal a droga, adda pay ti naala a dua a bala ti caliber 5.56 a paltog.
Kabayatanna, inpetteng ti suspek nga awan ti maaramidan na iti nagbalin nga operasyon dagiti otoridad.
Kuna na a nu pay ipetteng na nga awan ti pakainaigan na kadagiti nasukimat dagiti otoridad ket daytoy ti naduktalan iti operasyon.
Nu pay kasta, atapen ti suspek a ti naiyuswat nga operasyon ket tapno laeng agsubli iti pagbaludan iti laksid a nabayagen a nagsardeng kadagiti iligal nga aktibidad na.
Maibasar iti nailanad iti Search Warrant No. 72-2022, maiyuswat ti operasyon gapu iti panagsalungasing ti suspek ti Republic Act No. 9165 wenno ti Comprehensive Dangerous Drugs Act of 2002.
Kabayatanna, naamoan a ti suspek ket naibalod idi 2019 kalpasan ti naiyuswat a drug buy-bust operation.
Nupay kasta, nawaya-wayaan met laeng daytoy iti pagbaludan kalpasan ti nasurok maysa a tawen babaen iti plea bargaining.
