LAOAG CITY – Inbatad ni Mr. Jun Arvin Gudoy, Director IV – Public Affairs Service ti Department of Education (DepEd) nga adda dagiti naawat da a sumagmamano a saludsud manipod kadagiti nagannak iti panaglukat ti klase idi Lunes,Oktubre 5 ita a tawen.
Inbaga na a ti kaadoan a naawat a saludsud iti Public Assistance Command Center da ket mainaig iti panagenrol dagiti saan pay a nakaenrol nga ubbing, maipanggep iti blended ken modular learning, ken dadduma pay.
Inlawlawag ni Gudoy nga aminado da nga agad-adjust pay laeng amin para iti modular learning.
Innayon na a manghire ti DepEd ti 10 ribo a nayun ti para-teachers a tumulong kadagiti ubbing nga awan ti nagannak wenno kabagyan na a tumulong iti panagbasa da.
Mainaig iti daytoy, inbaga ni Gudoy a ti module ket nadisenyo kas self-learning module.
Inpetteng ni Gudoy nga ad-adda nga awan ti maadal dagiti ubbing no maminpinsan a maisardeng ti sumagmamano a bolan ti panagadal da.
Kabayatanna, nagpalawag met ni Gudoy mainaig iti maipagarop a panagpakamatay ti maysa nga ubing gapu ta saan nga inawat ti mestra wenno mestro na ti module na gapu ta naladaw a nagisumitir.
Inlawlawag na a basar iti naawat da a report ket pebrero pay laeng idi maipagarop nga agpaspasar ti depresyon ti ubing ken uray ti ama ken kabagyan na ket mamati a saan a gapu iti module ti nagpakamatayan ti biktima.
Nupay kasta, immunan a naibaga ti ina ti ubing a saanna a naipasa ti module na isut gapuna a nagatap dagiti tattao a daytoy ti makaigapu a nagpakamatay ti biktima.
Kuna pay ni Gudoy nga ado dagiti factors a possible a nagpakamatayan ti ubing ken saan a gapu iti module.
Mainaig iti daytoy, inbaga ni Gudoy a mamati nga adda ti konsiderasyon dagiti mangisursuro iti panagawat da ti module no adda dagiti estudyante a maladaw nga agisumitir.
