LAOAG CITY – Pinagtignayen ni Senate Committee on National Defense Chairman Senador Jinggoy Estrada dagiti maseknan nga ahensya ti gobierno a dagus a solusyunan ti nakita a Russian attack submarine iti West Philippine Sea iti napalabas a lawas.
Partikular a ginutigot ti senador ti Department of National Defense, Armed Forces of the Philippines, Department of Foreign Affairs a lawlawagan da a naimbag ti intensyon iti kellaat nga iseserrek ti Russian attack submarine iti baybay a sakop ti pagilian.
Segun ken ni Estrada, makaalarma ti sitwasyon ken possible a maikabil iti alanganin ti kinatalged ken seguridad ti maritime domain a sentro dagiti geopolitical tensions.
Agamak pay ni Estrada a iti presensya ti foreign military assets kangrunaan na dagiti addaan ti offensive capabilities a mangpangato ti risgo ti saan a panagkikinnaawatan ken riribok iti sensitibo a paset ti rehiyon.
Kabayatanna, inrakurak met ni Senador Joel Villanueva a masapol nga ad-adda pay a paigetan ti panagbantay iti kabaybayan a sakopen ti Pilipinas.
