LAOAG CITY – Naglikudan ti sumagmamano a senador ti agwarwaras a damag a plano a mapadisi ni Senate President Francis “Chiz” Escudero, innem laengen a session days ti nabati iti congressional calendar sakbay ti Yuletide break ti kongreso.
Naglikudan ni Sen. Cynthia Villar nga isuna ti maipagarop a mangsukat ken ni Escudero kas mangidaulo iti senado.
Uray ni Sen. Ramon “Bong” Revilla Jr. ket ibilang na a peke a damag ti plano a pannakapadisi iti pwesto ni Senate President Escudero.
Kuna met ni Sen. Alan Peter Cayetano a patienna nga awan ti kinapudno na ti isyu, ken no bilang mapasamak daytoy ket iyuray laengen kadagiti sumarsaruno nga aldaw.
Kabayatanna, inpaganetget ni Senate President Pro Tempore Jinggoy Estrada ken ni Senate Deputy Majority Leader JV Ejercito a saan a kasapulan a mabaliwan ti Senate leadership gapu ta mapnek ti kaadoan a senador iti panagtrabaho ni Escudero.
Innayon ni Estrada dakkel a makatulong iti panagbalin nga abogado ni Escudero no bilang maiyuli iti senado ti impeachment complaint kontra ken ni Vice President Sara Duterte.
