LAOAG CITY – Inlawlawag ni Doctor Alan Taylan dagiti sumagmamano a sintomas no makagat ti uleg ti maysa a tao.
Kuna na a karaman kadagiti mapasaran a sintomas ket ti panagulaw, agsakit ti ulo, mapukawan ti poot, aggurigor, marigatan nga umanges, agbaliw ti kolor ti kudil, pumardas ti pitik ti puso, ken ngumato wenno bumaba ti blood pressure.
Inbatad ni Taylan a ti umuna nga aramiden no makagat ti uleg ket masapol a sabunan ken dalusan ti mismo a nakagat kalpasan na ket bungunen ti nadalos a tela.
Mainaig iti daytoy, nagpalagip ni Doctor Taylan a ti panagpasuma ket saan a 100 a porsiento a maikkat ti gita ti uleg iti bagi ti maysa a pasyente.
Inbalakad ni Taylan a nasaysayaat no agturong iti ospital tapno isu ti pakaagasan ti pasyente gapu ta mabalin nga ipatay ti maseknan no saan a dagus a maagasan.
Innayon na a no makagat ti uleg ket saan a paiddaen ti pasyente gapu ta mabalin a saan a napintas ti panag-circulate ti panaganges na.
Reaksyon daytoy ni Doctor Taylan kalpasan a pimmusay ti maibilang a “King Cobra of the North” a taga ili ti Solsona kalpasan a nakagat ti uleg.
