LAOAG CITY – Inpakammo ni Mayor Rafael Benemerito iti ili ti Pagudpud a nai-lockdown dagiti sumagmamano a sitio kadagiti barangay a residensya dagiti tallo a baro a positibo iti covid-19.
Tallo a sitio ti nailockdown iti Barangay Balaoi, tallo met iti Barangay Poblacion 1 ket maysa a sitio iti Barangay Saguigui iti nasao nga ili.
Segun kenni Benemerito, daytoy ket tapno nalaklaka ken al-alisto ti maiyuswat a contact tracing.
Ni IN-C11 ket maysa a babai nga agtawen ti 31 ken residente iti Brgy. Balaoi; IN-C12 ket maysa a lalaki nga agtawen ti 24 ken residente iti Brgy. Poblacion Uno, kenni IN-C13 ket maysa a lalaki nga agtawen ti 29 ken residente iti Brgy. Saguigui iti nasao nga ili.
Kunana nga adda ti close contact da IN-C11 kenni IN-C12 kenni IN-C6 idinto a ni IN-C13 ken nakapulapol na ni IN-C9 itay kallabes.
Ummuna iti daytoy, kuna ni Benemerito a nasurok 100 a tattao ti nakapulapol da IN-C6 ken IN-C9 ken karaman kadagitoy da IN-C11, INC-12 ken IN-C13.
Mainaig iti daytoy, inbatad ti mayor a mabalin nga ikonsiderar daytoy a local transmission.
Inbatad ni Benemerito a dagiti tallo a nagpositibo iti covid-19 ket agdama a naka-qauarantine iti balay da ngem nakordonan dagitoy.
Inlawlawag na a ti sumaruno nga addang da ket ti idadalan iti swab test dagiti miembro ti pamilya dagiti tallo a nagpositibo iti virus.
