LAOAG CITY – Mamati ti Ukraine a posible nga agsanod iti pannakirinnupak dagiti suldado ti North Korea a nakikappeng iti puersa ti Russia.
Basar iti Ukrainian special forces a ti napalabas a tallo a lawas ket awan ti nakitadan a suldado ti North Korea.
Mabalin a nagsanod dagitoyen gapu iti kinaadu dagiti pimmusay iti grupoda.
Maipalagip nga iti napalabas a bulan, dumanon iti 11 a ribu a suldado ti North Korea ti naipatulod tapno makirinnupak kaduada ti Russia.
Naammoan a kapasan ti sumurok maysa a lawas ket addan ti sumurok sangaribu a suldado ti North Korea ti natay.
Immunan nga inbutaktak ti South Korean intelligence agency a saan a nakasagana iti realidad ti panagrinnupak dagiti suldado ti North Korea isu a nakigtotda ken nagbalin a target dagiti drones ti Ukraine.
