LAOAG CITY – Inpakaammo ni Dr. Arthur Cabello, ti city veterinarian ditoy siudad ti Laoag nga adda ti uppat a baboy ti nagpositibo iti African Swine Fever iti Brgy. 29 ditoy siudad.
Inbatad na a dua kadagitoy ket pimmusay.
Mainaig iti daytoy, kuna ni Cabello a mabanbantayan met iti Brgy. Camanggaan kalpasan nga adda ti natay a baboy.
Inpalgak na nga addan ti naalaan ti sample iti nasao a barangay ken maiyur-uray ti resulta daytoy.
Immunan nga inpakaammo ni Cabello a maysa a technician ti baboy ti napan iti maysa a lugar iti ili ti Sarrat a mabanbantayan gapu iti posible a kaadda ti ASF.
Kuna na nga adda ti posibilidad a nabitbit ti technician ti virus ken posible a kimmapet iti arwaten na agingga naikayar kadagiti taraken a baboy iti Brgy. 29.
Nu pay kasta, inbatad na a naiget a maadal daytoy tapno maamoan ti pudno a rason ti pannakaapektar ti ASF dagiti baboy ditoy siudad.
