LAOAG CITY – Naitantan ti sumurok maysa nga oras dagiti tren idiay Italy gapu iti mapagat-atapan a panang-sabotahe kalpasan a nauram dagiti kable ti tren kagiddan iti pannakaisayangkat ti Winter Olympics iti Milan ken Cortina d’Ampezzo manipud idi Pebrero 6.
Naapektaran dagiti serbisio iti nagbaetan ti Naples ken Rome pakairamanan ti linya nga agturong iti amianan iti Florence.
Kinondenar ni Transport Minister Matteo Salvini ti insidente ken nagpanawagan ti panangsungbat kadagiti responsable kas ti kapada a problema a napasaran ti ahensia iti napalabas a lawas.
Im-imbestigaran itan dagiti otoridad kadagiti maipagarup a nauram a kable iti maysa a seksyon ti high-speed line iti nagbaetan ti Rome ken Naples pakairamanan ti dua a posible a kaso ti vandalism iti kabisera ken iti Florence.
Maipalagip nga idi Sabado, umuna nga aldaw ti Winter Olympics, inakklon ti anarchist group ti responsibilidad ti panangatake iti network nga asideg iti Bologna no sadinno a nadadael ti imprastraktura ti riles a nangitunda ti sumurok dua nga oras a pannakaitantan iti high-speed, intercity ken regional train services.
Agtultuloy ti imbestigasion tapno mabirukan dagiti suspek ken maliklikan ti nayon a pannakaitantan iti transportasion kabayatan nga agtultuloy dagiti ay-ayam.
