LAOAG CITY – Kiniddaw ni Mr. Francisco Martin, dati a Presidente ti Federation of Tricycle Association of Laoag wenno FETAL a maipangato ti plete imbes a fuel subsidy ti maipaay kadakuada a tricycle drivers ditoy siudad ti Laoag.
Daytoy ket kalpasan a nangrugin ti panangipatungpal ti big-time oil price hike dagiti oil companies iti intero a pagilian idi kalman, Marso 10.
Segun kenkuana, kalikagumna a mapagbalin a 30 a pisos ti singir iti plete para iti regular fare, 25 a pisos para kadagiti senior citizens idinto a 20 a pisos met para kadagiti estudiante.
Inbatadna a nasaysayaat a maipangato ti plete ngem ti pannakaipaay ti fuel subsidy kadakuada gapu ta saan met nga umdas daytoy a mangsupusop iti panagpasadada.
Inlawlawagna a daytoy a kiddawda a maipangato ti plete ket temporario laeng wenno maisublinto met laeng ti dati a singirda ti plete apaman a bumaba ti presio dagiti produkto a petrolyo.
Kunana a basar kadagiti nakasarsaritana a padana met laeng a tricycle driver ket addan ti pannakaipangato ti plete iti ili ti San Nicolas.
Innayonna nga adda koma ti maisayangkat nga emergency meeting para kadagiti tricycle drivers ditoy siudad ti Laoag tapno mapagnunumoan ti maipanggep iti arungaingda a maipangato ti plete.
Kabayatanna, bayat a maisursurat daytoy a damag ket adda ti 220 a pisos ti napasadaan ni Martin no sadinno kagudua iti daytoy ket pagpakargana ti gasolina nga arig awan met laeng ti mabati a maiyawidna iti pamiliana.
