LAOAG CITY – Saan a nailibak dagiti sumagmamano a tricycle drivers ditoy siudad ti Laoag a dakkel a padagsen kadakuada ti agarup tallo a pisos a panagngato ti gasolina inton sumaruno a lawas.
Segun ken ni Mr. Alimar Navarro, Tricycle Operators and Drivers’ Association President ti Barangay 51-A Nangalisan ditoy siudad ti Laoag, awan ti maaramidanda ti sabali manen a pannakaipatungpal ti panagngina ti gasolina gapu ta kasapulanda met ti agpagasolina tapno makapasada dagitoy.
Inbatadna a saanda met a mabalin nga ipangato ti plete dagiti mailuganda a pasahero gapu ta awan met ti naiyetnag a pagannurotan.
Nupay kasta, mangnamnama ni Navarro ken dagiti padana a tricycle drivers nga adda ti ipaay iti lokal a gobierno wenno gobierno probinsial a fuel subsidy tapno maalay-ayan ti mapaspasaranda a rigat.
Inlawlawagna nga agarup 200 a pisos iti kada aldaw ti pagpagasolinana ken agarup 700 a pisos iti kada aldaw ti mapasadaanna.
Innayonna a no maikkan daytoy ti gundaway a manayonan ti plete ket insingasingna ti dua a pisos.
