LAOAG CITY – Narpuug manen ti sumagmamano a paset ti Kilauea volcano kalpasan iti idadayyeg ti magnitude 5.3 a gingined idiay Big Island, Hawaii.
Inrakurak ni Bombo International Correspondent Manny Pascua iti Hawaii a naduktalan daytoy kalpasan ti panaginspeksyon dagiti kameng iti US geological Survey babaen ti panaglugan da iti helicopter.
Kuna pay ni Pascua a basar kadagiti volcanologists ket immado ti ramay ti agay-ayos a lava iti Kapuho ken agpangpangta a lamuten na ti maysa a pampubliko a pagadalan iti Puna District.
Iti agdama, umaboten metten iti 700 a balay ti linamot ti lava idinto nga addan iti 1,114 nga indibidual dagiti nagpalista tapno dumawat ti tulong iti Federal government.
Kabayatanna, inbatad ni Pascua nga adda dagiti sumagmamano a balay nga inabandonar dagiti residente iti Big Island Hawaii kalpasan a bimtak ti Kilauea volcano a sinerrek dagiti mannanakaw.
Agpapan ita ket saan pay a masinunuo dagiti otoridad no siasinno dagiti nagserrek kadagiti sumagmamano a balay ti nasao nga isla.
