LAOAG CITY – Kalikagum ti Petition for Certiorari and Prohibition a kwestionaren ti nagbalin a proseso ti impeachment a nangrugi iti reklamong nga inpila iti Kamara.
Dinakamatda a ti panangrugi daytoy ket adda dagiti procedural errors, Constitutional infirmity ken jurisdictional void.
Naammoan a dagiti nangisubmitir ti petision ket isuda Atty. Israelito Torreon, Atty. Martin Delgra, Atty. James Reserva, Atty. Hillary Olga Reserva ken dadduma pay.
Mainaig iti daytoy, ti nasao a naipila a petision ket makukwestionaran iti proseso ti impeachment a nangrugi iti nasao a reklamo ken adda dagiti panagbiddot a procedural, constitutional infirmity ken jurisdictional void.
Kabayatanna, posible a talantanenen ti Korte Suprema ita nga aldaw, Pebrero 18, ti petision nga agkidkiddaw nga i-compel ti Senado a rugian nga insigida ti impeachment trial kontra ken ni Vice President Sara Duterte.
Inbatad ni Supreme Court Spokesperson Camille Sue Mae Ting, idi kalman ket na-raffle ti nasao a petision ken posible nga ita nga aldaw ken mairaman daytoy iti agenda ti Korte Suprema pakairamanan dagiti dadduma pay a petision.
Maipalagip a naipila ti nasao a petision idi Pebrero 14 iti panangidaulo ni Catalino Generillo Jr., dati a Presidential Commission on Good Government special government counsel.
Iti petision ti grupo ket kidkiddawen dagitoy a sumreken ti Korte Suprema ken piliten ti Senado nga insigida a rugian ti trial gapu ta saan nga ipalpalubos ti Konstitusion nga itantan daytoy uray pay a naka-break ti Senado.
Kiniddaw ti grupo nga insigida nga ag-constitute ti Senado kas maysa nga impeachment court tapno tingitinginen ti Bise Presidente.
