LAOAG CITY – Inpetteng da Quezon City Rep. PM Vargas ken CWS Party-list Rep. Edwin Gardiola a kalikagumda met ti agpapada a kinapudno iti isyu iti flood control project ditoy pagilian.
Boluntario a simmango ni Vargas iti Independent Commission for Infrastructure ken inprisentarna dagiti dokumento a mangipaneknek nga iti distritona ket awan ti ghost project-na.
Inpakitana dagiti sumagmamano a napapateg nga impormasion tapno makatulong iti imbestigasion ti komision.
Nagyaman ni Vargas iti gundaway nga ikorihir dagiti pammerperdi kontra kenkuana.
Kabayatanna, inbatad ni Gardiola a sangoenna dagiti akusasion iti husto a proseso ken panagdengngeg nga irespetar ti karebbenganna.
Immuna a nairaman ti nagan ni Gardiola kalpasan nga inakusaran ni Batangas Rep. Leandro Legarda Leviste mainaig iti “pre-order” a ₱20 bilyon a proyekto iti 2025 budget.
