LAOAG CITY – Posible a mangipila ti ethics complaint dagiti miembro ti Lakas-CMD kontra ken ni Cavite 4th District Rep. Kiko Barzaga gapu iti maipagarup a panangiwarasna ti awan ti pangibasaran nga alegasion kontra kadagiti padana nga agpanpanday linteg.
Inbatad ni Lanao del Sur Rep. Zia Alonto Adiong, awan ti kinapudnona dagiti in-post ni Barzaga mainaig iti maipagarup a taripnong ti Lakas-CMD iti kallabes maipanggep iti panagbalin nga state witness ni Leyte Rep. Martin Romualdez.
Kunana a saan a pudno a protektaran ti partido ni House Majority Leader Sandro Marcos, pakairamanan da dati a Sen. Bong Revilla, Representatives Jayjay Suarez, Roman Romulo, Adiong ken ti maipagarup a panangipetteng ni First Lady Liza Araneta-Marcos ken ni Sen. Chiz Escudero iti imbestigasion ti Independent Commission for Infrastructure (ICI).
Inlawlawag ni Adiong a saan a miembro ti Lakas-CMD ni Romulo ken awan daytoy iti nasao a panagtataripnong.
Nagatendar met ni Majority Leader Marcos tapno agyaman iti suporta ti partido iti 2026 national budget.
Kuna ni Adiong, seryoso dagiti miembro ti Lakas a mangipila ti ethics complaint gapu iti panangiwaras ti awan ti kinapudnona ken panangdadael iti reputasion kadagiti miembro nangruna kadagiti saan a nagatendar iti taripnong.
Nagpanawagan ni Adiong ken ni Barzaga nga isentro ti orasna iti panangputar ti linteg ken panangtulong iti distritona nga imbes nga agiwaras ti saan a pudno nga impormasion.
