LAOAG CITY – Mairekreklamo ti sumagmamano nga agtartaraken ti baboy iti Barangay Parut iti ili ti Vintar gapu iti maipagarup a nabangsit nga angot.
Segun ken ni Barangay Kagawad Warden Acoba iti nasao a barangay, apaman nga adda ti maawatda a reklamo maipanggep iti nabangsit nga angot gapu iti panagtaraken ti baboy ket insigida nga agtignay wenno solbaren dagiti opisial ti barangay iti nasao a parikot dagiti residente.
Inbatadna nga awan met ti pormal a maipadpadanon a reklamo kadagiti sector kagawad maipapan iti nabangsit nga angot iti panagtaraken ti baboy.
Inlawlawagna nga adda ti maiwaywayat a barangay assembly iti barangayda ngem awan ti aniaman nga idandanon dagiti kabarangayanda mainaig iti nasao a reklamo.
Inadmitirna a saan a daytoy ti umuna a daras nga adda ti kastoy a reklamo gapu ta idi saan pay nga opisial ti barangay ket addan dagiti mangmangngengna a kapada a problema.
Mainaig iti daytoy, inpakaammo ni Barangay Kagawad Warden Acoba a dagiti agtartaraken ti baboy ket masapul nga adayo kadagiti kabalbalayan ken nasken nga adda bukudna a septic tank a pakaikabilan ti rugit dagitoy.
Innayonna a gapu iti daytoy a problema dagiti kabarangayanna ket kalikagumda a mangaramid ti pagalagadan a dagiti agsalungasing iti daytoy ket mapatawan ti multa ken makumpiskar dagiti tarakenda a baboy.
Immuna iti daytoy, adda ti naawat a reklamo ti Bombo Radyo Laoag babaen ti ipa-Bombo segment nga adda ti sumagmamano a residente iti Barangay Parut iti ili ti Vintar ti agrekreklamo kadagiti agtartaraken ti baboy gapu iti maipagarup a nabangsit nga angot daytoy.
