LAOAG CITY – Naitantan ti pannakaiwayat dagiti sumagmamano nga aktibidad ti gobierno lokal ditoy ciudad ti Laoag para iti selebrasyon ti National Disability Right Week gapu iti pannakasuspenso ti trabaho ti gobierno gubuay ti dakes a paniempo.
Daytoy ti inpakaammo ni Mr. Christopher King Medina, ti Disability Affairs Officer 4 iti Persons with Disability Affairs Office.
Inbatad na nga adda koma ti maiwayat a computer literacy training idi huwebes ken ita nga aldaw a pakipasetan dagiti addaan ti rangkap ti bagi ngem nakanselar daytoy.
Inlawlawag na a saan da a mabalin nga ipilit ti pannakaiwayat ti panagsanay gapu ta vulnerable dagiti partisipantes iti nasao nga aktibidad.
Innayon na a mabalin a maituloy laengen ti pannakaiwayat ti computer literacy training intono Agosto gapu ta dagiti trainers ket manipod iti Technical Education And Skills Development ken adda dagiti nakalinya nga aktibidad da iti sabali a lugar.
Kabayatanna, inpakaammo ni Medina a balligi ti pannakaiwayat ti skills training a panagluto a naiwayat iti Laoag City Multi-purpose Hall idi Martes, Hulyo 22.
Kuna na nga adda ti 40 a partisipantes a bukbukeln dagiti Persons with Disability kadwa da dagiti nagannak da.
Inrakurak na a dakkel a tulong daytoy nga addang tapno maaddaan ti bukod a pamastrekan dagiti maseknan.
