LAOAG CITY – Ag-host ti probinsya dagiti sumagmamano nga aktibidad para iti agmakabulan a pannakaobserbar ti Fire Prevention Month a mangrugi intono bigat, Marso 1.
Segun kenni Fire Senior Inspector Ronald Castillo, ti Fire Marshal ti Bureau of Fire Protection ditoy ciudad ti Laoag, ti kick-off ceremony ket idaulwan ti Regional Director Chief Supt. Rizza D. Simbajon pakairamanan ti Command group ti Regional Office.
Karaman kadagiti maiyuswat nga aktibidad ket ti zumba iti 5:30 iti parbangon, sarunwen ti motorcade iti ciudad ti Laoag ken San Nicolas pakairamanan dagiti establishiment, barangay officials, ahensya, estudyante ken dadduma pay.
Kunana a babaen iti nasao nga aktibidad, maiyadal iti publiko ti kinapateg ti panangprebentar ti uram ken no kasano a masebseban no adda ti uram a mapasamak.
Inbatad na nga adda pay ti simulation drills kas iti panangresponde no traffic accidents ken medical response.
Karaman pay ti Fire Road show no sadinno ket maipakita dagiti kagamitan iti firefighting, medical ken ti rope rescue ken dadduma pay.
Mainaig iti daytoy, kuna ni Castillo a karaman kadagiti rason no apay nga adda dagiti mapaspasamak nga uram ket saan a responsable dagiti tattao nangruna ket napigsa ti angin nga isu ti mangitunda ti dakkel nga uram.
