LAOAG CITY – Naiget a tuttutukan ti Philippine National Police ti anggulo nga utang mainaig ti pannakapalto-paltog a nakatayan ni Conrado Castillo iti Brgy. Guerero iti ili ti Dingras itay kallabes.
Daytoy ti inbatad ni Police Major Ryan Retotar, hepe ti PNP Dingras ngem saan da a makumpirmaran no manu ti nautang ti biktima ken siasinno dagiti nakautangan na.
Kuna na nga adda pay ti nagibagbaga nga add ti pannakainaig ti biktima iti iligal a druga ngem saan a simmuko iti PNP.
Para kenni Retotar as-asideg a dagiti utang ti biktima ti posible a rason a nangpapatayan da kenkuana.
Malaksid iti daytoy, kitkitaen da pay ti anggulo a love triangle a possible a makagapu ti nangpapatayan da iti biktima.
Innayon na a maidalan iti ballistic examination dagiti narekobre a kapsula ti kalibre 45 ken kalibre 9mm a paltog agraman dagiti dua a buli ti bala.
Iti mainaig a damag, iyur-uray ni Police Major Ryan Retotar, hepe ti PNP Dingras ti resulta ti ballistic examination kadagiti narekobre a kapsula ti kalibre 45 ken kalibre 9mm a paltog iti nakapasamakan ti pannakapalto-paltog a nakatayan ni Conrado Castillo itay kallabes.
Kuna na a no bilang agpada dagiti narekobre a kapsula ti bala ti paltog iti napasamak a pammaltog iti ili ti Sarrat a nakatayan ti biktima a taga Dingras itay napan a bulan ti Disyembre ket kayat na sawen a maymaysa a grupo daytoy.
Inbatad ni Retotar a kitkitaen da pay no adda iti pannakainaig ti drug surenderer a biktima ti pammaltog iti ili ti Sarrat kenni Castillo iti pannakainaig na iti iligal a druga ngem saan a simmuko.
Malaksid dagiti nadakamat nga anggulo ti imbestigasyon possible nga adda pay ti gura dagiti saan a nabigbig a suspek kontra kenni Castillo.
Kageddan na iti panagpanawagan ni Retotar iti al-alisto a pannakasolbar ti insidente ken panagbantay dagiti opisyal ti barangay tapno maipaay ti naan-anay a linak, urnos, ken talna iti lugar da.
