LAOAG CITY – Agtultuloy ti naiget a panagensayo dagiti napili ken kualipikado nga atleta para iti mapaspasangasangan a Palarong Pambansa inton Hulio 3 idiay siudad ti Cebu.
Segun ken ni Mr. Gene Reginaldo, ti Sports Supervisor iti Department of Education, adda ti 75 nga atleta ti makibinnalubal kadagiti nagduduma nga sporting events idinto a 21 a coach ti sumurot a mangbayabay kadagiti maseknan nga umaayam.
Inbatadna a maysa kadagiti kangrunaan a pambato ti Ilocos Norte ket ti baseball ken softball elementary manipud iti Maglaoi Elementary School iti ili ti Currimao idinto a ti softball secondary ket idauluan met ti Vintar National High School iti ili ti Vintar.
Inlawlawagna a dagiti sumagmamano nga sporting events a pakilabanan dagiti nasao nga atleta ket iti tay-ak ti artery, athletics, swimming, table tennis ken dadduma pay.
Innayonna nga awan ti sayangenda nga aldaw iti panagensayoda tapno sigurado a makagun-odda ti medalya ken puesto iti naindaklan nga aktibidad.
Maipalagip a nagbalin a naballigi ti pannakaisayangkat ti 2024 Region 1 Athletic Association Meet a nakipasetan dagiti 14 nga Schools Division iti intero a rehion uno no sadino ti Schools Division ditoy siudad ti Laoag ti nakagun-od ti kampeonato.
