LAOAG CITY – Inbatad ni Mr. Damaso Oledan Jr., ti mangidadaulo iti Leyte Sports Academy manipod iti Eastern Visayas Region a naaddaan ti problema dagiti sumagmamano nga atleta da kabayatan ti panagbiyahe da nga agturong ditoy Ilocos Norte.
Kunana nga iti koma pay napalabas a lawas a nakadanun da ditoy probinsya ngem nadeldelay ti flight da.
Gapu iti daytoy, inrakurak ni Oledan nga inpadalan da a dagus ti panagsanay dagiti atleta da apaman a nakadanun da ditoy probinsya tapno saan danto a maikawa intono madanun ti labanda.
Iti baet daytoy, inpasingked ni Oledan nga aramiden da amin tapno agtalinaed da a Ranked 5 para iti athletics wenno nangatngato pay.
Malaksid iti daytoy, inpanakkel ni Oledan ti maysa kadagiti athletics a sansanayen na gapu ta isuna ti nagkampeon iti Palarong Pambansa 2024 a naangay idiay Cebu City.
Kabayatanna, inpakaammo ni Crisha Mae Tajarros nga awan met pay ti napasaran na a problema iti panagsanay para iti running.
Kunana nga uray agbagbagyo kem nakabarbara ti panawen iti lugar da ket intultuloy na latta ti panagsanay na.
Inbatad na nga aramiden na amin tapno magun-od na manen ti umuna a pweso.
Innayaon ni Tajarros a ti inspirasyon na para iti laban na ket ti pamilya, papagayam, teammate ken ti coach na.
