LAOAG CITY – Inpeksa ni Mr. Jonathan Salvador, maysa kadagiti tricycle driver ditoy siudad ti Laoag ti pannakadismayana iti maipagarup a panangsingir ti padana a tricycle driver ti sobra a plete kadagiti sumagmamano nga atleta ti Region 1 Athletic Association Meet manipod idiay Pangasinan.
Segun kenkuana, daytoy ket kalpasan nga adda ti nangsaludsod kenkuana a mangisursuro ken agad-adal manipod iti Pangasinan no mano ti agdama a plete a maipatpatungpal ditoy siudad ti Laoag.
Inbatadna a siningir ti saan pay a nabigbig a tricycle driver dagiti dua a pasahero ti 150 a pisos nga aggapu iti Ilocos Norte Centennial Arena a napan iti maysa a dakkel a mall iti ili ti San Nicolas.
Gapu iti daytoy, kalikagum ni Salvador a mapatawan ti pannusa a pannakasuspinde ti panagpasada dagiti padana a driver nga abusado ti panagsingirda ti plete kadagiti pasahero ken agsalsalungasing kadagiti naiyatnag a pagannurutan ditoy siudad kas ti overcharging.
Kunana a nakababain ti kastoy nga aramid dagiti sumagmamano a tricycle driver nangruna ket manarimaan a maisaysayangkat ti Region 1 Athletic Association Meet no sadino host ditoy probinsia.
Mainaig iti daytoy, inbatad ni Police Senior Master Sergeant Eric Bumagat, ti mangidadaulo iti Philippine National Police – Traffic Division ditoy siudad ti Laoag nga awan met pay ti naawatda a report maipapan iti nasao a reklamo.
Nupay kasta, inpakaammona nga addan ti immun-unan a tignay nga inaramidda no sadino kinataripnongda dagiti amin a Presidente kadagiti nagduduma nga asosasion dagiti tricycle driver ditoy siudad ti Laoag tapno impormaran dagitoy maipanggep iti nasao a banag.
