LAOAG CITY – Nangitunda ti sumagmamano nga auroras ti kapigsaan a solar storm a timmama iti lubong iti napalabas a dua a dekada.
Basar iti impormasion, nakita dagiti aurora manipod iti Tasmania idiay Australia agingga iti United Kingdom.
Ti umuna a coronal mass ejections wenno panagpakita ti plasma ken magnetic fields manipod iti init ket simmangbay iti 1600 GMT, basar iti National Oceanic and Atmospheric Administration – Space Weather Prediction Center.
Naipangato ti kategorya ti solar storm kas “extreme” geomagnetic storm no sadino ti naudi a gundaway a napasamak iti kastoy a kakaro a solar storm ket idi Oktubre 2003 a nangitunda ti nalawa a blackouts idiay Sweden ken South Africa.
Inabisoanen dagiti otoridad dagiti satellite operator, airlines ken power grid a saganaan ti posible a pannakaitantan wenno pannakabalbaliw iti magnetic field ti lubong.
