LAOAG CITY – Adda ti epekto ngem ‘hypothetical ken manageable’ ti plano a “zero remittance week” dagiti overseas supporters ni dati a Presidente Rodrigo Roa Duterte.
Kumbinsido dagiti ekonomista a made-delay laeng daytoy ken agdudupudop inton sumaruno a bulan.
Para ken ni Bank of the Philippine Islands (BPI) lead economist Emilio Neri Jr., ti plano dagiti sumagmamano nga Overseas Filipino Workers (OFWs) nga isardeng ti panangipatulod ti kuarta ditoy Pilipinas mangrugi idi Marso 28 agingga inton Abril 4 ket agtalined a “very big if,” ken depende no kabaelan dagiti Overseas Filipino Workers a saan nga agipatulod ti kuarta kadagiti ay-ayatenda iti biag.
Inbatadna a nagpangta dagiti sumagmamano a grupo ti Overseas Filipino Workers idiay Europa a saanda a mangipatulod ti kuarta ditoy Pilipinas manipud idi Marso 28 agingga inton Abril 4, 2025.
Ti zero remittance week ket protesta iti inwayat a panangarestar ken ni Duterte a nakabalud ita iti The Hague tapno imbestigaren ti International Criminal Court (ICC) iti kasona a crime against humanity.
