LAOAG CITY – Nangipakita ti panagdanag dagiti eksperto kadagiti Pilipino nga agkidkiddaw ti dialysis procedures gapu iti kidney failure.
Basar iti report, ti bilang ti dialysis patients iti pagilian ket immulin iti 42% manipod iti 25,125 idi 2022 iti 35,714 idi 2023.
Ti kellaat a panagngato ti bilang ket mabalin a maikonektar iti panagadu dagiti tattao a na-diagnose nga addaan ti diabetes ken hypertension a maibilang a lifestyle diseases.
Nupay kasta, malaksid iti pisikal a discomfort nga itunda ti kidney failure, ti panag-avail ti dialysis ket mabalin a nagastos nupay man adda iti 156 dialysis session ti sakupen ti Philippine Health Insurance Corporation (Philhealth).
Kalikagum ti Philhealth nga ipangato ti coverage daytoy iti dialysis package iti P5,200 iti kada sesyon manipod iti agdama a P2,600.
Mangnamnama ti state health insurer a malpas ti panagadal iti plano iti uneg ti maysa a bulan.
Kabayatanna, no matuloy ti gakat, dakkel a tulong daytoy para iti adu a pasiente a dumaldalan iti dialysis.
