LAOAG CITY – Maipaay ti serbisio medikal para kadagiti empleado ti construction firm nga agtrabtrabaho iti Plaza del Norte Convention Center ken iti Provincial Capitol extension.
Daytoy ket babaen iti Memorandum of Agreement nga ikkan ti bileg ti Sangguniang Panlalawigan ni Gov. Matthew Marcos Manotoc a mangibagi iti Gov. Roque B. Ablan Sr. Memorial Hospital a makipinnirma iti Project Manager ti construction firm a ni Mr. Arnold Pradet.
Segun ken ni Bokal Dr. Medeldorf Gaoat, Chairman ti Committee on Health, babaen iti nasao a katulagan ket mabenipisiaran dagiti maseknan nga empleado kadagiti nagduduma a pasilidad iti nasao a balay-pagagasan.
Inbatadna nga adda ti 80 agingga 100 nga empleado ti agpapaay iti Plaza del Norte Convention Center idinto nga adda met ti sumurok-kumurang 30 nga empleado iti Provincial Capitol extension.
Inlawlawagna saan a kasapulan ti nayon a medical staff iti ospital gapu ta saan met nga aggegeddan dagiti maseknan nga empleado nga agsakit.
Innayonna a nangrugi nga inpatungpal ti nasao a construction firm daytoy a proyekto idi Oktubre 2024 ken agngudo ita a tawen 2025.
