LAOAG CITY – Kalikagom dagiti sumagmamano nga hog raisers iti ili ti Paoay a ngumato ti presyo iti kada kilo ti live weight ti baboy.
Segun kenni Mrs. Norma Tapec, nababa unay ti 160 a pisos iti kada kilo ti live weight isut gapo na a kalikagom da a maipangato tapno adda ti pagabrutan da nangruna ket nangina dagiti kanen dagitoy.
Inlawlawag na a mapagbalin kuma a 185 agingga iti 190 ti kada kilo ti live weight tapno saan da a malugi.
Kunana nga iti makabulan ket maysa a sako ti feeds ti kanen ti maysa a buryas agingga a mailako da dagitoy.
Immapela met ni Mrs. Leticia Tapec kadagiti opisyal ti Ilocos Norte a maikkan ti importansya ti arungaing dagiti hog raisers.
Daytoy ket gapo ta iti napagtutulagan da kadagiti naglabas a taripnong ket 200 a pisos iti kada kilo ti live weight ken 320 a pisos iti kada kilo ti karne.
Inpalgak na a naipatungpal met daytoy iti sumagmamano nga aldaw ngem rumrumuar a nakita dagiti meat vendors nga arig na awan ti mapastrek da rason a naibaba iti 190 a pisos iti live weight.
Nupay kasta, kunana nga ad-adda pay a bimmaba iti kada kilo ti live weight agingga iti 160 a pisos iti laksid nga awan met ti kastoy nga inbaga ti lokal a gobierno ti ili da.
Mainaig iti daytoy, inpetteng ni Mrs. Leticia a no dadduma ket makissayan ti kilo ti baboy nangruna no umabot iti 120 a kilos gapo ta ti maibagbaga kadakuada ket overweight daytoy.
Kabayatanna, nagpanawagan ni Mrs. Leticia ti naiget a pannakaipatungpal ti linteg iti biang ti hog industry.
