LAOAG CITY – Napalaos ti panagamak dagiti residente idiay probinsya ti Bulacan gapo iti panagdayyeg a nagpigsa ti magnitude 6. 1 a gingined a nagsentro idiay Zambales.
Daytoy ti inbatad ni Mr. Frank Lester Cadiente, tubo ditoy ciudad ti Laoag ken agdama nga adda idiay probinsya ti Bulacan.
Segun kenni Cadiente, bayat a nakaidda isuna ket nakigtot laengen gapo ta kellaat ti panaggungun ti sofa, cabinet ken ceiling fan iti balay da.
Inlawlawag na pay a dagiti poste ti kuryente iti lugar da ket arig nalukneng a nawagwag.
Inbatad na a kabayatan ti gingined ket naulaw da pay a nakatakder gapo iti kinapigsa na ken arig na agpuligos da.
Kunana a ti ammo na ket nagpaot ti nasao a gingined iti 30 a segundo.
Mainaig iti daytoy, inpasigurado met ni Cadiente a natalged ti kasasaad da iti agdama iti laksid ti nasao a gingined.
Kabayatanna, inbatad ni Ms. Lady Mae Castillo, taga Barangay Bungcag idiay ili ti Dingras ken agdama nga agtrab-trabaho kas Accounting Assistance iti maysa nga Insurance Company idiay ciudad ti Makati, a nabalakadan da nga empleado nga dagus a rumwar iti pasdek.
Segun kenni Castillo, adda da iti maika-30 a kadsaaraan iti pasdek idi narikna na ti ibilang na a kapapautan a gingined a napuutan na sipud ti kaadda na iti nasao a ciudad.
Inbatad na a napawilan da nga agusar ti elevator ken nagusar da amin nga empelado ti agdan agingga a madanon da iti kalsada.
Kunana nga adda pay ti dimmanon kenkuana nga impormasyon nga adda ti nabuong a tawa iti nasao a pasdek.
Mainaig iti daytoy, kuna met ni Miss Ms. Dulce Marcelino, taga ili ti Solsona ken agtrab-trabaho kas Finance officer idiay Pasig City, arig na lumned ti pasdek a pagpapaayan na gapo iti kinapigsa ti gingined.
Gapo iti daytoy, napagawid da met a nasapa gapo kadagiti aftershocks.
