LAOAG CITY – Nagduduma ti reaksion dagiti umili iti Ilocos Norte iti alegasyon ni Sen. Imee Marcos kontra ken ni Presidente Ferdinand “Bongbong” Marcos Jr. nga agus-usar iti illegal a droga.
Segun kenni Mr. Greg Mendez II, tricycle driver ditoy ciudad ti Laoag, saan na a patien nga agus-usar ti presidente ti droga gapu ta ammo na a natakneng a tao daytoy.
Inbatad na a saan a propesional ti wagas a panangtrato ni Senador Imee iti bukodna a kabsat.
Inpettengna nga uray natataengan ni Sen. Imee ket rumbeng a respetaren a latta ti kabsatna kas Presidente ti Pilipinas.
Kunana a mismo a ni Sen. Imee ti mangar-aramid ti wagas tapno maibabain ti pamilya na gapo iti panangpabasolna.
Innayonna a posible nga adda ti makibibiang tapno ad-adda a kumaro ti pungtot ni Senator Imee.
Mainaig iti daytoy, kuna met ni Atty. Zsa Zsa Raval, maysa a private practitioner ken lead convenor ti Ilocos Norte Tropang Angat a saanen a baro daytoy nga alegasyon gapo ta kalpasan ti eleksyon ket arig na nagbalinen a kaalyado ni Sen. Imee ni Vice Pres. Sara Duterte.
Inlawlawag na a saan a napintas nga aggapo a mismo iti miembro ti pamilya ti alegasyon ken adda ti epekto na daytoy kdagiti supporters da.
Kunana a ti maysa kadagiti kasayaatan nga aramiden ti presidente ket isu ti mangidaulo a dumalan iti hair follicle test kasta met kadagiti agpanpanday linteg.
Maipalagip nga inbatad ni Sen. Marcos a maipagarop nga agus-usar ti presidente ken First Lady Liza Araneta-Marcos iti iligal a droga.
Kalpasan daytoy, binabalaw ni Ilocos Norte First District Rep. Sandro Marcos dagiti rakurak ni Senador Imee kontra ken ni Presidente Marcos ken ti First Lady, nga inawaganna dagitoy a “web of lies” ken awan nagibasaran na.
