LAOAG CITY – Maysa a grupo dagiti inhinyero idiay Prinsenbeek, Netherlands ti nakagun-od ti world record kalpasan a nakapartuatda ti kaatiddugan a bisikleta iti intero a lubong.
Kinumpirmaran ti records keeping organization a Guinness World Records nga isuda Ivan Schalk, Joost Sweep, Jimmy Vermeeren, Sander Vissers, Bas Zuidema, Steffie van de Riet, Daan Husson, Toine Kleemans, Jasper Korving ken Op De Beek Hebben We De Langste ti nakaaramid ti “Longest Bicycle” gapu ta addaan ti kaatiddug a 55.16 a metro wenno 180 a kadapan ken 11 a pulgada. Maidasig daytoy iti kadakkel ti Leaning Tower of Pisa idiay Italy nga addaan ti walo a kadsaaran.
Segun iti leader ti grupo a ni Ivan Schalk, ubing pay laeng daytoy ket arapaapnan a makabukel ti atiddug a bisikleta. Sipod idi nabasana a libro a Guinness Book of World Records a mabalin a makaaramid ti atiddug a bisikleta, maysa daytoy kadagiti nagbalin a life long dream-na.
Agtartrabaho ni Ivan Schalk iti festival float ken rinugianna nga aramiden ti bisikleta idi 2018 tunggal awan ti pakakumikumanna. Nagsardeng ti bisikleta ti dua a tawen idi kangitingitan ti COVID-19 pandemic.
Kalpasan a pinadayawan ti Guinness, i-display ti bisikleta iti local history museum ti Prinsenbeek.
