LAOAG CITY – Pinadayawan ti Ilocos Norte Police Provincial Office dagiti sumagmamano a Municipal Police Station ditoy probinsya.
Napadayawan ti PNP Sarrat nga indadauloan ni Police Chief Insp. Roldan Suitos gapu ti ballaigi a panangiwayat da ti Comelec checkpoint kalpasan ti pannakakumpiskar da ti dua a kalibre 45 a paltog kabayatan ti checkpoint.
Napadayawan pay PNP Paoay nga idadauloan ni Police Sr. Insp. Grandeur Tangonan gapu ti ballaigi a panangiwayat da ti search operation kontra ti mapagat-atapan a gun runner itay kallabes.
Mainaig iti daytoy, immapela ni Police Chief Insp. Angelito De Juan, hepe ti Investigation Section ti INPPO iti publiko nga agireport kadagiti damo na ti agnaed iti maysa nga lugar.
Kuna na nga masapul nga amuem dagiti maseknan ti nagan, contact number ken ti lugar a naggapuan da tapno maamuan ti background dagitoy.
Daytoy ket mainaig ti pannakatiliw dagiti wanted person a nakapagnegosyo payen iti ili a Pagudpud.
Pinalagipan pay ni De Juan dagiti tao ti INPPO nga agusar latta ti helmet no nakalugan ti motorsiklo uray adda iti uneg ti INPPO.
