LAOAG CITY – Nagpila ti pormal a reklamo ti sumagmamano nga indibidwal, karaman dagiti Obispo, retired generals ken civil society leaders kontra ken ni Commission on Elections Chairman George Erwin Garcia.
Naipila ti reklamo iti National Bureau of Investigation Anti-Fraud Division kontra ken ni Chairman Garcia ken siyam a sabsabali pay.
Basar iti 15 a pinanid a reklamo a naisumitir iti ahensya, naipalaon ti akusasyon nga adda ti napasamak a pannakibiang iti transmission dagiti botos idi Mayo ita a tawen.
Gapu iti daytoy, inpila da ti reklamo a ‘system interference’ iti babaen ti Paragraph 4 (a) ti Republic Act 10175 wenno ti Cybercrime Prevention Act of 2012.
Inpetteng dagiti complainants nga illegal ti inaramid ti Commission on Elections a sukatan ti certified ken audited software program version a 3.4.0 iti Automated Counting Machines (ACMs) a saan a sertipikado ti program version a 3.5.0.
Karaman pay ditoy ti alegasyon a panangdalos wenno panang-depete ti agarop 5 a milyon a botos iti vote discrepancy a ti laeng Commission on Elections ti nangaramid nga awan ti presensya wenno partisipasyon ti siasinno man manipod iti 5 transparency groups.
Naamoan a karaman kadagiti nagpila ti reklamo ket isuda Atty. Alex Lacson ken ti Isabela Vice Mayor ti Reina Mercedes a ni Atty. Harold Respicio.
Iti met biang ti Commission on Elections, silulukat ti komisyon para iti imbestigasyon seknan kadagiti akusasyon a maibatbato kangrunaan na iti napalabas nga eleksyon.
